പാലക്കാട് : കേന്ദ്ര ന്യൂനപക്ഷ മന്ത്രാലയം ന്യൂനപക്ഷ വിഭാഗങ്ങളിലെ പെണ്‍കുട്ടികൾക്കായുള്ള ബീഗം ഹസ്രത്ത് മഹൽ (മൗലാനാ ആസാദ്) സ്കോളര്‍ഷിപ്പിന് അപേക്ഷ ക്ഷണിച്ചു. 9 മുതൽ 12 വരെ ക്ലാസുകളിൽ പഠിക്കുന്ന പെണ്‍കുട്ടികളെയാണ് സ്കോളര്‍ഷിപ്പിനായി പരിഗണിക്കുന്നത്. അവസാന പരീക്ഷയിൽ 50% ൽ അധികം മാര്‍ക്ക് നേടിയ, വാർഷികവരുമാനം 2 ലക്ഷം രൂപയിൽ താഴെയുള്ളവരായിരിക്കണം അപേക്ഷകർ.

 പ്രസ്തുത സ്കോളര്‍ഷിപ്പിന് അർഹത നേടുന്ന 9,10 ക്ലാസുകളിലെ പെണ്‍കുട്ടികൾക്ക് 5000 രൂപയും, 11,12 ക്ലാസുകളിലെ പെണ്‍കുട്ടികൾക്ക് 6000 രൂപയും ലഭിക്കുന്നതാണ്. മറ്റു സ്കോളര്‍ഷിപ്പുകൾക്ക് അപേക്ഷിച്ചവരേയും, ലഭിക്കുന്നവരേയും ഈ സ്കോളര്‍ഷിപ്പിന് പരിഗണിക്കില്ല. ആധാർ കാർഡിന്റെ കോപ്പി, വരുമാന സർട്ടിഫിക്കറ്റ്, കഴിഞ്ഞ വര്‍ഷത്തെ മാർക്ക് ലിസ്റ്റ്, സ്കൂൾ വെരിഫിക്കേഷൻ ഫോം എന്നീ രേഖകൾ സഹിതം ഓൺലൈനായി അപേക്ഷിക്കാം. അവസാന തീയതി ഒക്ടോബർ 31.